Sobre o director

Alber Medraño nace en 1977 no seo dunha familia obreira de Vigo, pero moi cedo se traslada a Ourense por motivos familiares, onde pasará a súa infancia. Nos seus antergos non había ningún músico, pero os seus pais que eran moi melómanos deciden que os seus tres fillos terían que estudar música. A falta de recursos económicos provoca que só poidan mercar un clarinete para os tres, e os irmáns teñen que repartir o tempo para practicar. Estas condicións afectaron moito aos nenos, que de moi novos aprenderon a esforzarse moito e organizar ben o seu tempo de estudo para sacar as súas carreiras de músicos. Na actualidade, e despois de superar todas estas condicións adversas, os seus pais poden ter o orgullo de presumir de que todos os seus fillos son músicos profesionais e viven da música.

Como este neno veu cumprido o seu soño de ser director de banda e músico profesional foi sen dúbida unha demostración máis do triunfo do poder da vontade sobre a adversidade. Grazas ao seu esforzo, tesón e traballo, Alber Medraño converteuse nun dos directores de banda e dos mestres de música actuais máis revolucionarios e innovadores, influíndo xa dende hai máis de 25 anos nas novas xeracións de músicos xoves que accederon á súa pedagoxía.